Kryeministri në detyrë i Kosovës, Albin Kurti, ka reaguar për herë të parë lidhur me vendimin e Shteteve të Bashkuara për të pezulluar Dialogun Strategjik me Kosovën – një vendim që pason veprimet dhe qëndrimet e fundit të Qeverisë së tij, të cilat janë cilësuar si shqetësuese nga Uashingtoni.

Duke folur gjatë mbledhjes së Qeverisë në detyrë, Kurti u përpoq të sqarojë situatën, duke theksuar se nuk bëhet fjalë për ndonjë ndërprerje të marrëdhënieve me SHBA-n.

“Së pari duam të qartësojmë për qytetarët tanë se bëhet fjale për pezullimin e planifikimit të një dialogu strategjik jo të dialogut si proces strategjik të nisur dhe as të komunikimit të rregullt që ne e kemi, nuk jemi prishur me Amerikën por kemi disa dallime”, tha ai.

Ai kritikoi opozitën për, siç tha, tendencën për të përshkruar çdo zhvillim në raportet me SHBA-në në mënyrë alarmuese, ndërkohë që vetë qeveria, sipas tij, i trajton me seriozitet qëndrimet e partnerëve ndërkombëtarë.

“Ndonëse opozitarët po e stërmadhojnë në dritë negative çdo ndodhi për raportet e qeveris sonë me qeverinë amerikane unë nuk duhia ti minimizojë zhvillimet e fundit. I siguroj qytetarët se Qeveria jonë i trajton seriozisht deklaratat e qëndrimet e Ambasadës amerikane”, tha ai./Arbresh.info